أزيكوا وحشتوني ... يا ترى فكرين اخر كلام قلناه عن نشأت الحياه على الارض؟
تعالوا نفتكر مع بعض كده .. احن قلنا بعد ما الارض اتغطت بالمياه و كونت المحيط الشاسع بدأت كمية من التفاعلات الكيميائية بين المواد التي كانت تملأ المحيط صانعه منه شوربة من خليط من المواد الكيميائية المختلفة و ده بالاضافه الا الطاقة الضوئية و الاشعة الكونية التي تأتي من الفضاء مع الانفجارت البركانية بدأت سلسلة من التفاعلات الكيميائية كونت الحمض الاميني الي كون البروتين و حمض الDNA ,و من هنا بدأت رحلة نشأت الحياه على الارض و تطورها
طيب السؤال دلوقتي احنا عرفنا الكلام ده منين ؟
لما نسأل السؤال ده عن الفضاء و مابه ممكن نقول بالمشاهدة و تطور اجهزة رصد الاجسام الفضائية لكن نشأت الحياه و تطورها عرفناها منين ؟
في حاجات كتير بعضها ليها ادلة واضحة و مثبته زي الحفريات (بقايا و اثار الكائنات الحية مدفونه في الصخور الرسوبية) الي وجدها العلماء و هما بينقبوا تحت الارض و في الجبال و الصخور
طبعا هاتقولوا ان تكون الحفرية ليها شروط منها مثلا ان يكون ليها هيكل صلب يتحجر داخل الصخور المتراكمه عليه مع الزمن و الخلايا و المواد الكيميائية و بعض انواع من النبات و الحيوان ليس لها هياكل
وجهة نظر فعلا , سيبني اوضحلك الفكرة : في بعض الكائنات الرخوة الي مالهاش هيكل سابت بصمتها على الصخور الطبعه بتاعت شكلها و هي اتحللت من زمان و الطبعه دي ادفت بسرعة نتيجه لتغيرات كانت بتحصل على الارض فجأة في بداية تطورها لان الارض ماكنتش مستقرة زي دلوقتي و كان فيها براكين وزلازل و انقلابات مناخية تغطي الارض كلها بالجليد على طول و تستمر لفترات طويله
طيب ماشي الكلام ده مقنع لكن لسه في سؤال مهم الفترة الي حصل فيها التفاعلات الكيميائية و اتكونت فيها المادة الاولية للكائنات الحية عرفناها منين ؟
تمام سؤال مهم جدا , دي تم استنتاجها ووضع نظريات خاصه بها على اساس التجارب التي كانت تحدث داخل المعامل , يعني مثلا مجموعه من العلماء احضروا قارورة بها ماء و تم توصيله بقارورة تانية فيها غاز النيتروجين و الميثان و ثاني اكسيد الكربون و مرروا شرارة كهرية عليهم لفترة و كانت النتيجة المذهلة ان الماء اصبح له لون و تغيرت طبيعته تماما و لما وضعوا عينه منه تحت الميكرسكوب كانت المفاجأة تكون الحمض الاميني الي بيتكون منه البروتين المسئول عن تكوين الجين و الصفات الوراثية ايه رأيك بقى في الحكاية دي ؟
استنى شوية ما تستعجلش في حاجه كمان ملاحظة الكائنات الاولية زي البكتيريا و الفيروسات و الفطريات و الطحالب و ازاي بتتكاثر و التطور الي بيحصلها احيانا لو حصل تغير في الظروف المحيطة حوليها ده غير بقى ان في حيوانات و نباتات لسه موجوده لحد دلوقتي بس نادرة و في اماكن معينه من الارض لم تصل لها اليد البشرية الحديثة و يراقبها العلماء و تقوم عليها ابحاثهم تسمى بحلقة الوصل لانها تحمل صفات تربط بين مرحلتين يعني مثلا نوع من الاسماك لديه خياشيم يتنفس الاكسجين من الماء و كمان رئتين تخزن الهواء التي تحصل عليه من على سطح الماء و دي تعتبر حلقة وصل بين الاسماك و الثدييات زي الحوت و الدولفين هيه ايه رأيك , طيب تعرف ان الفيروسات من الكائنات الي بتعتبر حلقة وصل بين الكائنات الغير حية و الكائنات الحيه فهي تتكون من وحدات بروتينية و مادة وراثية لكنها لاتنشط الى اذا دخلت خلية كائن حي قبل كده بتبقى زي ذرة تراب في الهواء مالهاش اي تأثير .
خلاص اقتنعتوا ان الكائنات الحية مرت بمراحل كتير علشان تتطور ... طيب الحيوانات اتطورت ازاي بعد ما اتكونت الاحماض الامينية و ايه الي ساعد في انها تتنقل من مرحلة لمرحلة تانية اكثر تطور ؟
بصوا بقى بسبب كل الظروف الي احنا بنحكي عنها دي الاحماض الامينية اتحولت لشريط مفرد اسمه رنا (RNA) و بيسموه العلماء عالم الرنا ده كان بيتكون من القواعد النيتروجينية الي بتكون الجين الي بيكون البروتين الي بيكون الصفه الوراثية في الكائنات الحية و شريط الرنا ده تحت الظروف الي كانت بتتغير على الارض كل شوية اندمج مع شريط رنا تاني و كون الDNA ,و من هنا بدأت الرحلة العظيمة لبدأ الحياه على الارض و تطورها
طبعا اكيد هاتسأل و بعد ما حصل كل ده اتطورت ازاي بردو لسه السؤال ما اتردش عليه و هنا نوصل لاهم نقطة في رحلتنا و هي الطفرة طبعا هاتقول يعني ايه طفرة هاقولك يعني تغير بيحصل في التركيب الكيميائي للجينات الموجوده في الDNA بسبب كل الظروف الي قولناها ضوء الشمس و الاشعه الكونية الاتية من الفضاء والحرارة و المواد الكيميائية المنبعثة من البراكين ... الخ الخ وزي ما بيقول التعريف العلمي للطفرة انها بتنتج صفات جديده ممكن تكون مرغوب فيها و مفيده للحياه و ممكن تكون غير مرغوب فيها و هنا يدخل بقى الانتخاب الطبيعي الي كان بيخلي في كائنات حية تستمر و غيرها ينقرض و يختفي تمام لحد ما وصلنا الى ارضنا الحالية و حياتنا الي احنا بنعيشها
و الى اللقاء مع حواديت علمية تانية
ليست هناك تعليقات:
إرسال تعليق